日期：2023.7.16
嘉賓：陳珏明，前《蘋果日報》人物專題組首席記者，投身傳媒工作近 20 年，2023 年 1 月 1 日創辦《庭刊》，現任《庭刊》總編輯。
＊＊＊
編按：在今天說「記錄時代」，首選法庭新聞。這也解釋了，為甚麼專職跟進法庭的公民媒體，會在媒體淡季，逆市「開張」。
但本心再熾熱，營運上還是要面對現實，例如人手、例如錢。運作逾半年的《庭刊》，近來低調告急 ─── 很多人都沒聽過。
苦惱資源，又想保持新聞的純粹，這個晚上，陳珏明分享的，是好記者，成為笨蛋「腦細」的故事。
＊＊＊
關於創辦《庭刊》
「 其實你唔走入去個法庭裏面呢……你係唔會知裏面發生咩事」
「我相信都係可以喺呢個時空，幫助大家仍然係將嗰啲案件放在心內」
「我哋冇諗到好天花龍鳳，嘩我哋要追求公義，但我諗，我哋係希望一個制度，如果佢可以有改善得好啲嘅地方，藉住我哋嘅手，所作好微細嘅事……能夠有少少嘅光」
「讓我們先用行動為記，續以記者之軀，走進那個爭取公義之地採訪記錄，直視真實，寫出事實，因為 “Everything that’s true is beautiful“ 」
關於《庭刊》的小小成績表
「做咗大概八百四十幾篇嘅報道……超過一百四十萬字」
「譬如『47人案』啦，我哋其實寫咗大概一百九十篇嘅報道……每一日嘅審訊，我哋都有超過平均超過兩篇嘅報道」
「『立場案』開審咗我哋先至出現啦，咁但係我哋都寫咗超過一百篇嘅報道」
「我數得到嘅，我哋報道過嘅案件，如果根據案件編號去統計，大概係有超過三百四十宗嘅案件」
關於法庭新聞
「講到法庭仲係咪一個爭取公義嘅地方，我諗大家可能去到今時今日，一定有保留喺裏面」
「但係我哋冇辦法跳出一個現實，就係個法庭繼續運作，檢控繼續發生」
「案件真係需要繼續去被報道、被關注」
關於年輕同事們
「得三個全職嘅前線記者……因為唔同嘅緣故啦，做開嘅公司冇咗、做開嘅平台冇咗」
「我成日都好擔心佢哋嘅健康……九點已經去到 court，七點要起身，但佢明明十一點幾仲同我傾緊公事嘅嘢」
「佢哋好輕輕地講，如果做唔到唔緊要嘅……提早少少啲其實一個月，你話畀我哋聽就得㗎啦。
咁我每次聽到嘅時候，我覺得好難過嘅」
「我覺得，佢哋係好年青同埋好有心、好專業嘅記者，點解佢哋要豁達到咁呢，唔應該嘅」
關於財政狀況
「我哋（兩名總編輯）唔係出正常嘅人工……其實要喺另外嘅地方裏面呢，做 part time 去照顧我哋嘅生計」
「同事就喺公司畫咗一個bar chart……紅格代表住進入咗危急（狀態），黑格係代表應該做埋呢個月就要關門啦」
「而家係暫且都會過到十月嘅，十一月都可能會有機會過到咁囉」
「如果公眾，一個公共嘅空間認為我哋仲值得繼續存在，咁我哋就會繼續向前行」
關於實體紙本
「如果有人真係做咗呢個整合，你喺周末攞住一份報紙……可以有一個更快捷嘅途徑去精讀」
「大家應該唔記得咗，四個禮拜前嘅 「47人案」係審緊啲咩」
「畀大家可以用一個，更輕鬆、容易啲嘅方式去將資訊、新聞，能夠袋走、收藏佢……呢個係我哋，希望我哋未來有機會做到嘅一個角色嚟嘅」
＊＊＊
文字紀錄｜張慕瑾
攝影｜張慕瑾
編輯｜劉偉程
《留白》
Facebook｜ facebook.com/subtext.byhans
Instagram｜ @subtext.byhans
Comments