（是次為《留白》與 Wave. 流行文化誌 跨平台報道，專訪下集請前往 Wave. 社交平台閱覽。）
年底推出的《Juntos》，是 RubberBand（RB）的第十張大碟。翻看他們的 track record，過往每張大碟之間，最多都是相隔兩年多，這次足足隔了三年。成員們坦言，三年疫情，加上社會變化，RB 也一度陷入迷惘，甚至有成員想過，是否要另覓生計。鼓手黎萬宏（泥鯭）便認真地說，「真係有諗過去做其他嘢，睇吓會唔會有其他出路。譬如話，我想做狗嘅鮮食、寵物鮮食。」
但人總不能一直活在低谷。Life 還是 goes on，這刻他們還是在一起。用泥鯭的說法，這隻大碟是大家「撻返著部車」的證明，「唔好理架車轉數高唔高……有咩問題，之後再解決。」
四子以外，他們亦邀請了長期合作的雷柏熹（Patrick）和 Jason Kui，參與新碟創作。主音繆浩昌（6 號）便笑言，整個計劃像是大學生做 group project，「定期每個星期做一次編曲，然後再去宿營……根本就係一班大學生。」二人的加入，固然可以在音樂上帶來衝擊，但 6 號說，能 Juntos（西班牙語：在一起），其實已是最大意義，「因為你覺得，無論係夾 band，或者出嚟食飯，好簡單好必然嘅嘢，都唔係咁容易嘅時候……呢個名（《Juntos》），就係來自大家嘅感覺。」
＊＊＊＊＊
自 2008 年推出《Apollo 18》後，RB 每隔一、兩年便會推出大碟。即使之後更換唱片公司，到後來自組公司，依然維持傳統。他們以 alphabetical order 命名大碟的傳統，亦為樂迷增添了一點閒趣，可以猜度下一隻大碟的名字。
串流音樂如日中天，出大碟並非「性價比」之選，單曲、Mini EP 更合乎經濟效益。低音結他手李兆偉（阿偉）直言，RB 的其中一個執著，是要做實體專輯，「我哋幾個都係，很相信一個實物，唔係網上 download 可以比擬嘅一件事。可能來自我哋嘅成長，其實都係拎住一張唱片，一張紙嚟睇……金錢上，可能我哋要付出好多，其實我哋係相信嗰個價值。」
堅持出專輯 「除非再搵唔到人印 CD」
「除非呢個世界，我哋再搵唔到人印 CD、印黑膠……好純粹講，自己係希望堅持。」
2023 年年底再出大碟，事隔已三年。出專輯的傳統沒有打破，但他們都承認，過去三年有不少難過的日子。例如 6 號便經歷家人離世，「我都感謝隊友，佢哋應該知道，我因為媽媽離開，狀態都唔係太好，（創作方面）就唔會 push 得太勁。」疫情導致社會停擺，演出受限，音樂人生計艱難，泥鯭甚至曾經考慮開一個工場，做寵物鮮食，另謀出路。
疫情限制以外，他也坦言社會氣氛，令他們創作上多了考慮，「要重新適應，用一個咩方法去表達自己……社會事件，好多嘢都轉變咗，但係做創作，有好多嘢係無得迴避。」
就在前路最不明朗的時候，結他手馮庭正（阿正）向各人傳訊息，「佢就話，佢諗通咗，要每個星期寫首歌。」6 號笑言，「one week one song……要用決志呢個字去形容。」
6 號：好似大學生做 group project
同時，他們決定邀請 Patrick 和 Jason 加入，「覺得佢哋兩個勁人，合作應該會創作到好多嘢。」除了在港「度歌」，6 人之後也一起到泰國錄音，6 號形容，這次的六人行，正正便是大碟名稱《Juntos》的意思，「其實係代表 together……我哋 4 個，加上 Jason 同 Patrick……就好似一班大學生、中學生去做 group project。」
他形容，音樂的投入以外，整件事最重要的，便是大家「在一起」，「搵到嘅意思，就係一班人一齊去做一件事，一個共同目標。」
坦言作品受社會影響「變唔返之前」
大碟的 9 首歌，涵蓋了不同主題和不同的音樂類型。據專輯文案介紹，9 首歌代表的是與不同人、事、物的關係。6 號則坦白說，在選曲上其實相當隨性，哪一段旋律大家覺得好聽，能完成，就先收進去，亦有一些歌曲是有感而發，「我印象深刻嘅有，2022 年 2 月分，烏克蘭被俄羅斯入侵……被觸碰到嘅畫面係，一個防空洞，定係平時地下鐵嘅月台，避難嘅人都十足惶恐，但係有啲人識得玩樂器，好似係拉小提琴……就拉一曲，去安撫嗰一刻。」這個畫面，最後被編成旋律，成為專輯中其中一首歌，名為《只能給你奏著》。
RB 的曲風一向多變，他們亦說，自己本身不算是重型的樂隊，而 RB 過往不少廣受歡迎的歌曲，像《阿波羅》、《小涼伴》等，都以輕快節奏，groovy 為標誌，近年深入民心的則多屬 Ballad，如《Ciao》。這次《Juntos》已派台的歌曲中，《戀人日常的直線抽擊》便頗有過往的「chill 味」，在 YouTube 的留言中，便有人留言「搵返晒 RB 最早期嘅 chill」。
當有聲音說，希望找回「以前嘅 RB」，他們都異口同聲表示，不希望停留於過去，這亦是找來外援參與創作的原因之一。泥鯭倒直截了當，「變唔返之前嘅……最重要係嗰個社會，真係影響緊我哋，或者一直落嚟，都係社會影響我哋，我哋先有嗰啲作品。」6 號也認同，「長期都有呢種拉扯……做創作就係咁，好多時候想跳出框框，但有時覺得，跳得太遠就無咗自己，呢個位置好難去取捨。」
而 6 號說，找到平衡的方式，還是要「Juntos」，「好處係我哋樂隊有四個人……如果大家都有參與過，我相信件事係會有一個平衡，以及能夠係，我哋大家都想走嘅一步。」
「跟住落嚟，跳出呢個框框，行幾遠呢？我覺得呢個係一隊樂隊有趣嘅地方。」
撰文｜劉偉程
攝影｜Nasha Chan
Comments